ഓര്മ്മകള് മുള്ളുകളായ്
ഈ നെഞ്ചില് തറച്ചേക്കാം
കണ്ണുനീര് ചാലുകളും
ഇവിടേ ഉതിര്ന്നേക്കാം
എങ്കിലും തുടരുക
ഈയൊരു യാത്ര വീണ്ടും
മര്ത്യനീ ജന്മമെന്നാല്
തീരാത്ത യാത്രയല്ലേ !!!
കാലങ്ങള്ക്കപ്പുറത്തായ്
ദൂരങ്ങള് താണ്ടി വീണ്ടും
മറ്റൊരു തീരത്തില് നാം
ഇനിയും കണ്ടെത്തുമോ
ഓര്മ്മകള് മരിക്കുകില്ലെ-
ങ്കിലും മരവിച്ചോരീ മുഖം
ഓര്മ്മിക്കുവാന്
നിനക്ക് സാധിക്കുമോ
അല്ലെങ്കില് വെറുമൊരു
അപരിചിതരായി നാം
ഒരു ചെറു പുഞ്ചിരിയില്
വിട പറഞ്ഞകലുമോ
ഒരു പക്ഷേ ഓര്ത്തീടിലും
മിണ്ടുവാന് ആവാത്തതാല്
ഓടിപ്പോയ് ഏകാകിയായ്
വിതുമ്പി കരയുമോ
മൂകമാം സന്ധ്യകളില്
മാനത്തു കാണുന്നൊരു
ഏകാന്ത താരകമായ്
ഞാന് നിന്നെ കാണാനെത്താം
നിശയില് നിശബ്ദമായ്
ജാലക വാതില്ക്കല് നീ
പൂനിലാവുതിര്ക്കുമാ
പൂര്ണേന്ദു നോക്കി നില്ക്കെ
അകലെ ആരാമത്തില്
പൂത്തൊരു നിശാഗന്ധി
പൂവതിന് സൗരഭ്യമായ്
ഞാന് നിന്നരികിലെത്താം
കാതോര്ത്തിരുന്നാല്
നിനക്കെന്നുടെ ഗാനം കേള്ക്കാം
വീണ്ടും ഞാന് രാപ്പാടിയായ്
നിനക്കായ് പാട്ടു പാടാം
യാമങ്ങള് തീരുവോളം
യാമിനി നിനക്കായ് ഞാന്
ഒരു; യാഗമായ് എന് ജീവ
ഗാനമിന്നാലപിക്കാം
ഒടുവിലീ യാഗാഗ്നിയില്
ഞാന് എരിഞ്ഞു തീരുമ്പോഴും
നിന് ഓര്മ്മകള് ഗീതങ്ങളായ്
എന് ജീവനെ ഉണര്ത്തട്ടേ!
നിന് ഓര്മ്മകള് ഗീതങ്ങളായ്
എന് ജീവനെ ഉണര്ത്തട്ടേ!!!
No comments:
Post a Comment